افغاني سرې میاشتې په بادغیس ولایت کې پر زلزله ځپلو کورنیو مرستې ویشل پیل کړل
افغاني سرې میاشتې نن د ۱۴۰۰ لمریز کال د سلواغې پر ۳مه د بادغیس ولایت د قادس ولسوالۍ په غول چرخ کلي کې له زلزله ځپلو کورنیو سره د غیر خوراکي توکو مرسته پیل کړه.
ټاکل شوې افغاني سره میاشت به د بادغیس ولایت له شاوخوا سلګونو زلزله ځپلو کورنیو سره د خوراکي او غیر خوراکي توکو مرستې وکړې، چې پیل یې نن په یاد کلي کې ۱۸۰ زلزله ځپلو کورنیو سره د غیر خوراکي توکو مرسته ده.
یادو ۱۸۰ زلزله ځپلو کورنیو سره د افغاني سرې میاشتې له لوري په شوې مرسته کې یوه خیمه، یو ترپال، د پخلنځي ګڼ لوښي او د اوبو زخیره کولو لپاره بوشکې شاملې دي.
