نورستان کې د ۱۳۰ زده کوونکو درې میاشتنۍ زده کړې په ازموینه پای ته ورسېدې
دوشنبه، ۲۰ رمضان ۱۴۴۷
د افغاني سرې میاشتې د نورستان په ښوونیز مرکز کې د ۱۳۰ زده کوونکو درې میاشتنۍ زده کړې بشپړې شوې.
دغه زده کوونکي د اسلامي ښوونې او روزنې، انګلیسي ژبې، کمپیوټر او ریاضي په برخو کې له درې میاشتنیو زده کړو وروسته د وروستۍ ازموینې له ترسره کېدو سره فارغ شول.
په یاد مرکز کې دا مهال ۲۹۰ تنه زده کوونکي، چې د خصوصي ښوونیزو مرکزونو د فیس ورکولو وس نه لري، په بېلابېلو تعلیمي او مسلکي برخو کې په وړیا ډول زده کړې ترلاسه کوي.
افغاني سره میاشت هڅه کوي، چې د ښوونیزو مرکزونو له لارې اړمنو ځوانانو ته د مسلکي زده کړو زمینه برابره کړي؛ څو هغوی خپلې وړتیاوې لوړې او د مهارتونو پر مټ خپل راتلونکی روښانه کړي.
