د افغاني سرې مياشتې او په افغانستان کې د اسلامي همکاریو سازمان ترمنځ د سوري زړه ناروغانو د درملنې هوکړه لیک لاسلیک شو!
د افغاني سرې مياشتې او په افغانستان کې د اسلامي همکاریو سازمان ترمنځ د سوري زړه ناروغانو د درملنې هوکړه لیک لاسلیک شو!
د افغاني سرې میاشتې د سرپرست عمومي رئیس ښاغلي شیخ الحدیث شهاب الدین دلاور او په افغانستان کې د اسلامي همکاریو سازمان د استازي ښاغلي دکتور محمد سعید العیاش تر منځ نن سه شنبه د ذوالقعدې میاشتې پر لومړۍ نېټه د دې خیریه ملي ټولنې د سرپرست سکرتر جنرال ښاغلي مولوي روح الله عبدالسلام او د یاد سازمان د بشري مرستو د مسئول عماد الدین رباني په شتون کې د سوري زړه پر ناروغۍ د اخته ۳۰ تنو ناروغانو د درملنې او عملیاتونو د مالي لګښت د ورکړې برخه کې د همکاريو هوکړه لیک لاسلیک شو.
د یاد هوکړه لیک د لاسلیک پر مهال د افغاني سرې میاشتې سرپرست عمومي رئیس د اسلامي همکاریو سازمان له همېشنیو مرستو مننه وکړه او دې برخه کې یې د لا ډېرو ماشومانو د درملنې غوښتنه وکړه.
ورپسې د اسلامي همکاريو د سازمان استازي او مل پلاوي په خپلو خبرو کې د افغاني سرې میاشتې له لوري د ترسره کېدونکو بېلابېلو خدماتو ستاینه وکړه او ډاډ یې وړاندې کړ چې د دې خیریه ملي ټولنې له لارې به د بې وزله او اړمنو وګړو لاسنیوي ته دوام ورکوي او دې برخه کې به نوې پروژې هم پیلوي.
