پروان او کاپیسا کې د ورښتونو زیانمنو ۶۲ کورنیو ته بیړنۍ مرستې ووېشل شوې
سې شنبه، ۲۷ شوال ۱۴۴۷
د افغاني سرې میاشتې له لوري د پروان او کاپیسا ولایتونو په بېلابېلو سیمو کې د وروستیو ورښتونو له امله زیانمنو ۶۲ کورنیو ته بېړنۍ بشري مرستې ووېشل شوې.
له دې مرستو، پروان ولایت کې د بګرام ولسوالۍ د اړونده سیمو ۴۰ کورنۍ او د کاپیسا ولایت د مرکز، حصه اول کوهستان، حصه دو کوهستان، تګاب او کوهبند ولسواليو ۲۲ کورنۍ برخمنې شوې.
د وېشل شوو مرستو له مخې، په پروان کې هرې کورنۍ ته ۶ کمپلې، ۱ ترپال او د پخلنځي یو سیټ ورکړل شو، او ۴ هغو کورنیو ته چې کورونه یې په بشپړ ډول نړېدلي وو، یوه یوه خېمه هم ورکړل شوه.
او په کاپیسا کې هرې کورنۍ ته ۷ کمپلې، ۱ ترپال، د پخلنځي یو سیټ او ۲ د اوبو بشکې ورکړل شوې او ۳ هغو کورنیو ته چې کورونه یې په بشپړ ډول نړېدلي وو، د دې مرستو سربېره یوه یوه خېمه هم ووېشل شوه.
افغاني سره میاشت له زیانمنو کورنیو سره د مرستو لړۍ پرله پسې روانه ساتي.
