د اړمنو د لاسنيوي برخه کې د ترکيې سرې مياشتې د افغاني سرې مياشتې سره د بېلابېلو بشري مرستو ژمنې وکړې
د اړمنو د لاسنيوي برخه کې د ترکيې سرې مياشتې د افغاني سرې مياشتې سره د بېلابېلو بشري مرستو ژمنې وکړې
نن سه شنبه د ذوالقعدې میاشتې پر ۲۹مه، د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن د دې خیریه ملي ټولنې مرکزي دفتر کې په افغانستان کې د ترکیې سرې میاشتې له مسٸول ښاغلي نعیم کریمي سره بې سرپرسته مېرمنو، رواني ناروغانو، راستنېدونکو کډوالو او اړمنو وګړو ته د بشري مرستو برابرولو په موخه ناسته وکړه.
لیدنه کې سرپرست عمومي رئیس په افغانستان کې د ترکیې د سرې میاشتې په مالي ملاتړ د افغاني سرې میاشتې له لارې د اړمنو او بې سرپرسته وګړو د لاسنیوي په برخه کې د دوی له همکاریو مننه وکړه او له دې خیریه ملي ټولنې سره یې د فعالیتونو د پراختیا په موخه د لا ډېرو بشري مرستو ترسره کولو غوښتنه وکړه.
ښاغلي دلاور ډاډ وړاندې وکړ، چې د افغاني سرې میاشتې له لوري د مرستندویه بنسټونو مرستې په بشپړ شفافیت او عدالت تر اړمنو او بېوزله کورنیو رسول کېږي.
ورپسې په افغانستان کې د ترکیې سرې میاشتې مسٸول د افغاني سرې میاشتې فعالیتونه د ناچاره او بېوزله وګړو د ملاتړ برخه کې مهم یاد کړل او ژمنه یې وکړه، چې پلازمینه کابل کې د رواني ناروغانو د درملنې او پالنې مرکز کې په یو وخت ۷۰۰ ناروغانو ته د خوراک چمتو کولو ظرفیت لرونکي مجهز پخلنځي جوړولو ترڅنګ به نږدې راتلونکې کې کابل کې ۳۰۰ راستنو شویو کډوالو ته د خوراکي توکو بستې ووېشل شي.
دا راز نوموړي زیاته کړه، د ترکیې سره میاشت په پام کې لري د اختر په ورځو کې ۴۰۰۰ کورنیو ته د قربانۍ غوښه وویشي او هرات ولایت کې داخلي مشمولینو ته د حرفوي زده کړو په موخه نوې پروژې هم پیل کړي.
