د افغاني سرې میاشتې سرپرست عمومي رئیس د آی سي آر سي نړيوالې کميټې له عمومي مسٸول سره وکتل!
د افغاني سرې میاشتې سرپرست عمومي رئیس د آی سي آر سي نړيوالې کميټې له عمومي مسٸول سره وکتل!
نن شنبه د شعبان د میاشتې پر ۱۶مه، د افغاني سرې میاشتې سرپرست عمومي رئيس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیزالرحمن ددې خیریه ملي ټولنې په مرکزي دفتر کې د آی سي آر سي نړيوالې کميټې له عمومي مسٸول ښاغلي پېير کرېينبل، په افغانستان کې د یادې کمېټې مشرې آغلې کترینا رېټز ترمنځ د همغږۍ پر پراختيا او ګډو فعالیتونو بحث او خبرې وکړې.
ناسته کې سرپرست عمومي رئيس د ښه راغلاست سربېره د ګډو بشرپالو فعاليتونو د ترسره کولو په برخه کې د آی سي آر سي نړيوالې کميټې له دوامداره ملاتړ او مرستو څخه د مننې ترڅنګ راغلي پلاوي ته په هېواد کې د روان اقتصادي وضعیت، پراختیایي پروژو او لاسته راوړنو او د افغاني سرې میاشتې د بشرپالو فعالیتونو او خدمتونو په هکله مفصل معلومات وړاندې کړل.
ښاغلي دلاور د خپلو خبرو پر مهال زیاته کړه چې افغانان تازه له بدبختیو او نا امنیو څخه راوتلي چې اوس نړيوالو خیریه ټولنو ته تر بل هر وخت ښه فرصت دی؛ څو د کړېدلو افغانانو لاسنیوی وکړي.
دا راز نوموړي ډاډ څرګند کړ، چې افغاني سرې میاشتې ټولنې د خپلې وجیبې پر اساس د ملاتړو ټولنو مرستې په شفاف ډول له هر ډول تبعیض پرته تر وړ او مستحقو وګړو رسولي او له پلاوي یې په بشري برخو کې د افغانانو د لا زیات لاسنیوي هيله څرګنده کړه.
ورپسې ښاغلي کرېينبل په خپلو خبرو کې د افغاني سرې میاشتې د اغېزناکو فعالیتونو د قدردانۍ ترڅنګ وویل چې افغانان د تاریخ په اوږدو کې له زیاتو کړاوونو سره مخ شوي او د دوی لاسنیوی د آی سي آر سي نړيوالې کميټې مسؤلیت او کاري وجیبه ده.
دا راز نوموړي په خپلو خبرو کې د دواړو لوریو ترمنځ د دوه اړخیزو فعاليتونو د دوام او پراختیا ژمنه وکړه او زياته يې کړه چې له افغاني سرې میاشتې سره به خپلو مرستو او ګډ کار ته دوام ورکوي.
