کابل؛ د افغاني سرې میاشتې مرستیال د المان د سولې کلي له استازو سره په اور سخت سوځېدليو ماشومانو د درملنې په اړه خبرې وکړې
یکشنبه، ۲۰ جمادی الأولی ۱۴۴۸
د افغاني سرې میاشتې مرستیال حافظ عزیز الرحمن په کابل کې د المان د سولې کلي خیریه بنسټ له استازو ین يسن او کلاوډیا سره په کتنه کې د هغو افغان ماشومانو د درملنې او بېرته راستنېدو په اړه خبرې وکړې، چې په المان کې د دغه بنسټ په مرسته يې درملنه شوې ده.
په دې کتنه کې د هغو ناروغو ماشومانو د لېږد پر څرنګوالي هم بحث وشو، چې د المان د سولې کلي خیریه بنسټ له لوري انتخاب شوي او د معیاري درملنې لپاره به المان ته ولېږدول شي.
حافظ عزیز الرحمن د سوځېدليو او میکروبي هډوکو لرونکو ماشومانو د درملنې په برخه کې د المان د سولې کلي له همکاریو مننه وکړه او د دغو همکاریو د لا پراختیا غوښتنه یې وکړه.
نوموړي همدا راز د ژمي په درشل کې د اړمنو کورنیو د ملاتړ او راستنېدونکو کډوالو د ځان بسیاینې لپاره د کوچنیو کاروبارونو د برابرولو په برخه کې د دغه بنسټ د همکاریو د پراختیا غوښتنه وکړه.
په ورته مهال، د المان د سولې کلي استازو د افغاني سرې میاشتې بشري خدمتونه وستایل او د ناروغو افغان ماشومانو د درملنې په برخه کې یې د خپلو همکاریو د دوام ډاډ ورکړ. هغوی د ماشومانو په انتخاب، المان ته د لېږد او د درملنې له بشپړېدو وروسته خپلو کورنیو ته د هغوی په بېرته ستنولو کې د افغاني سرې میاشتې همکاري مهمه وبلله.
دواړو لوريو د ناروغو ماشومانو د درملنې، اړمنو کورنیو او راستنېدونکو کډوالو د ملاتړ او د بشري همکاریو د لا پیاوړتیا په برخه کې د ګډو هڅو پر دوام ټینګار وکړ.
افغاني سره میاشت د خپلو نړیوالو کاري شریکانو په همکارۍ د ناروغو ماشومانو د درملنې، د اړمنو کورنیو د ملاتړ او د زیانمنو کسانو د ژوند د ښه والي په موخه بشري مرستې او خدمتونه وړاندې کوي.
