کابل؛ افغاني سرې میاشتې او نړیوال فدراسیون د څلور کلنې روغتیايي پروژې پر پلي کېدو خبرې وکړې
پنجشنبه، ۹ محرم الحرام ۱۴۴۸
د افغاني سرې میاشتې د سکرتر جنرال عملیاتي مرستیال ښاغلي مولوي روح الله عبدالسلام، د روغتیايي خدمتونو رئیس ښاغلي ډاکټر عبدالله عرفان او د ننګرهار، کونړ او بغلان ولایتي نمایندګیو د مسؤولینو په حضور کې د افغانستان لپاره د ملي ټولنو نړیوال فدراسیون له استازي سره د اوبو، روغتیا ساتنې او لومړنیو مرستو د څلور کلنې پروژې د پلي کېدو په اړه د همغږۍ ناسته وشوه.
په دې ناسته کې د افغاني سرې میاشتې د سکرتر جنرال عملیاتي مرستیال د ملي ټولنو نړیوال فدراسیون له دوامدار ملاتړ او همکاریو مننه وکړه او ویې ویل، چې د نړیوالو شریکانو همکاري د بشري خدمتونو د لا اغېزمن تطبیق او پراختیا لپاره ځانګړی اهمیت لري.
نوموړي زیاته کړه، چې د اوبو، روغتیا ساتنې او لومړنیو مرستو نوې څلور کلنه پروژه به د خلکو د روغتیايي وضعیت په ښه والي، د ناروغیو په مخنیوي او د بنسټیزو روغتیايي او چاپېریالي اړتیاوو په پوره کولو کې مهم رول ولوبوي.
ورپسې د افغاني سرې میاشتې د روغتیايي خدمتونو رئیس د اوبو، روغتیا ساتنې او لومړنیو مرستو په برخه کې د پخوانۍ پروژې د لاسته راوړنو او تجربو په اړه معلومات وړاندې کړل او ویې ویل، چې نوې پروژه به د مخکینۍ پروژې د بریالیو پایلو پر بنسټ پلي شي، څو لا ډېرې اړتیا لرونکې کورنۍ تر خپل پوښښ لاندې راولي.
هغه د پروژې د بریالي تطبیق، د ټاکل شویو موخو د ترلاسه کولو او د خدمتونو د اغېزمنتیا لپاره د مرکزي دفتر، ولایتي نمایندګیو او د ملي ټولنو نړیوال فدراسیون ترمنځ پر دوامدارې همغږۍ ټینګار وکړ.
د یادونې وړ ده، چې دغه څلور کلنه پروژه د فینلنډ سره صلیب په مالي ملاتړ د ننګرهار، کونړ او بغلان ولایتونو کې پلي کېږي او موخه یې د اوبو، روغتیا ساتنې او لومړنیو مرستو خدمتونو ته د خلکو لاسرسی ښه کول او د زیانمنو ټولنو د روغتیايي وضعیت پیاوړتیا ده.
