کابل؛ د محاسبې او مالي لارښود ۱۵ ورځنی روزنیز ورکشاپ پیل شو
شنبه، ۱۹ جمادی الأولی ۱۴۴۸
د افغاني سرې میاشتې په مرکزي دفتر کې د محاسبې او مالي لارښود تر عنوان لاندې ۱۵ ورځنی روزنیز ورکشاپ پیل شو، چې د مرکزي دفتر او د بلخ، کندهار، کندز او هرات زونونو او اړوندو نمایندګیو ۳۰ تنه د مالي او عوایدو مدیران پکې ګډون لري.
دغه ورکشاپ د افغاني سری میاشتې د مالي ریاست له لوري، د ناروې سره صلیب په مالي ملاتړ، د مالي مدیریت د پیاوړتیا، حساب ورکونې د لوړولو او د مالي لارښود د اغېزمن تطبیق په موخه دایر شوی.
د ورکشاپ په ۱۵ ورځني بهیر کې به ګډونوالو ته د محاسبې، مالي لارښود، حساب ورکونې او مالي راپور ورکولو په برخو کې روزنه ورکړل شي؛ څو د مالي چارو د مدیریت او راپور ورکولو په برخه کې د هغوی مسلکي وړتیاوې پیاوړې شي.
د ورکشاپ په پیل کې د افغاني سرې میاشتې د سکرتر جنرال عملیاتي مرستیال مولوي روح الله عبدالسلام د مالي چارو اهمیت ته په اشارې وویل، چې په مالي برخه کې دقت او مسؤولانه مدیریت يې د ادارو د چارو په سمون او اغېزمنتیا کې مهم رول لري.
نوموړي له مالي مسؤولینو وغوښتل چې د خپلو دندو د ترسره کولو پر مهال د مالي چارو د شفافیت، د معلوماتو د کره ثبت، حساب ورکونې او پر وخت د راپور ورکولو اصول په پام کې ونیسي.
