د ملي ټولنو نړیوال فدراسیون؛ هڅه کوو د ختیځ زون زلزله ځپلو ته دایمي سرپناه او د اړتیا وړ ژمني توکي چمتو کړو
سې شنبه، ۲۷ جمادی الأولی ۱۴۴۷
د افغاني سرې میاشتې عمومي رئیس، ښاغلي شیخ الحدیث شهاب الدین دلاور د افغانستان لپاره د ملي ټولنو نړیوال فدراسیون له مسؤول ښاغلي حسام فیصل او د پروګرامونو له مسؤول ښاغلي احمد سلیمان سره ختیځ زون کې د وروستۍ زلزلې له امله زیانمنو شوو کورنیو ته د کورونو جوړولو، ژمنیو توکو او اوږدمهاله مرستو چمتو کولو په موخه وکتل.
کتنه کې ښاغلي دلاور د نړیوال فدراسیون له همېشني ملاتړ څخه مننه وکړه او د کونړ زلزله ځپلو ته د افغاني سرې میاشتې له لوري د وړاندې کېدونکو خدمتونو په اړه یې وویل، یادو زلزله ځپلو کورنیو ته له پخو خوړو رانیولې تر نغدو پیسو پورې مرستې رسول شوي او لا هم دا بهیر جریان لري.
نوموړي زیاته کړه، شمال زون کې هم د وروستۍ زلزلې له امله ګڼ شمېر هېوادوال زیانمن شوي او پراخ لاسنيوي ته اړتیا لري، له نړیوالو مرستندویه بنسټونو مو غوښتنه دا ده، څو له اغېزمنو شوو هېوادوالو سره خپلې مرستې لا ډېرې کړي.
په افغانستان کې د ملي ټولنو نړیوال فدراسیون مشر په خپلو خبرو کې د ختیځ زون زلزله ځپلو لپاره د افغاني سرې میاشتې له خوا ترسره کېدونکي خدمتونه د ستایلو وړ وبلل او یاده یې کړه، چې د کونړ ولایت زیانمنو شوو کورنیو ته د کورونو جوړول یې لومړیتوب دی او هم یې هغوی ته د اړتیا وړ ژمنيو توکو د چمتو کولو ژمنه وکړه.
