د افغاني سرې میاشتې مرکزي روغتون کې د شونډو او تالو چاود پر ناروغۍ د اخته ناروغانو درملنه پيل شوه!
د افغاني سرې میاشتې مرکزي روغتون کې د شونډو او تالو چاود پر ناروغۍ د اخته ناروغانو درملنه پيل شوه!
نن یکشنبه د ذو القعدې میاشتې پر ۲۰مه، د افغاني سرې میاشتې اړوند کابل مرکزي روغتون کې د دې خیریه ملي ټولنې په مرسته له بنګله دېش هېواد څخه د راغلو ماهرو ډاکټرانو له لوري د شونډو او تالو چاود په رنځ د اخته ناروغانو د وړیا درملنې او جراحي عملياتو په موخه پرانيست غونډه د افغاني سرې میاشتې د مرستیال ښاغلي حافظ عزیز الرحمن او د مرکز الاسلام خیریه بنسټ د مشر ښاغلي حمزه شهید الاسلام په شتون کې ترسره شوه.
غونډه کې د افغاني سرې میاشتې مرستیال د یاد بنسټ له لوري له افغاني سرې میاشتې سره د تېرو او اوسنیو مرستو مننه وکړه او د الله سبحانه و تعالی له دربار څخه یې د یاد مرستندوی بنسټ مسئولینو ته د خیر او اجر غوښتنه وکړه، نوموړي زیاته کړه، افغاني سره میاشت په ټول توان هڅه کوي مرکزي روغتون کې هېوادوالو ته په ټولو روغتیايي برخو کې د آسانتیاوو زمینه برابره کړي، ترڅو د ټولنې بې وزله او اړمن قشر وکولی شي د هرې ناروغۍ لرونکي ناروغان دلته تداوي کړي.
د دې ترڅنګ د افغاني سرې میاشتې د مرکزي روغتون رئیس ښاغلي ډاکټر عبد الولي اُتمانزي په خپله وینا کې ګډونوالو سره یاد روغتون کې د ترسره کېدونکو روغتیايي خدماتو په هکله معلومات شريک کړل او ډاډ یې وړاندې کړ، چې د افغاني سرې میاشتې د مرکزي روغتون مسئولین او کارکوونکي د هېوادوالو هر راز خدمت ته چمتو دي او دا چاره خپل ایماني مسئولیت ګڼي، نوموړي په روغتيايي برخه کې د مرکز الاسلام بنسټ خدمات نه هېرېدونکي او د قدر وړ وبلل.
ورپسې د بنګله دېش هېواد د مرکز الاسلام بنسټ په استازولۍ ښاغلي حمزه شهید الاسلام په خپلو خبرو کې د افغاني سرې میاشتې له لارې د ناچاره او اړمنو وګړو د لاسنیوي او درملنې ترڅنګ راتلونکي کې د سترګو او سوري زړه په رنځ د اخته ناروغانو د درملنې په برخه کې د لا ډېرو همکاریو او ملاتړ ترسره کولو ژمنه وکړه او زیاته یې کړه، چې دا به له افغانانو سره د دوی وروستۍ مرسته نه وي، بلکې د خپلې ایماني وجیبې له مخې به د داسې ناچاره او بېوزله وګړو لاسنیوي ته دوام او پراختیا ورکوي.
د یادونې وړ ده چې د شونډو او د تالو چاود د عملیاتو او درملنې پیل شوی بهیر به د ثور د میاشتې له ۲۸ مې نېټې څخه د جوزا میاشتې تر ۴مې نېټې پورې دوام ومومي.
