کابل؛ روغتیاپالانو ته د ناروغیو د ملي څارنې او غبرګون په اړه درې ورځنی ښوونیز ورکشاپ پیل شو
دوشنبه، ۲۲ ذو الحجه ۱۴۴۷
د افغاني سرې میاشتې له لوري د کابل، هرات، نیمروز، پکتیکا او ننګرهار ولایتونو د ګرځنده روغتیايي ټیمونو ۱۲ تنو روغتیاپالانو ته د ناروغیو د ملي څارنې او غبرګون تر عنوان لاندې درې ورځنی ښوونیز ورکشاپ پیل شو.
دغه ورکشاپ، چې د ناروې سره صلیب په مالي ملاتړ ترسره کېږي، ګډونوالو ته به په کې د سرویلانس اړوندو ناروغیو د پېژندنې، د خطرونو د ارزونې، د سرویلانس د بېلابېلو برخو او د ناروغیو د معلوماتو د راټولولو، ثبت، راپور ورکولو او مخنیوي په اړه لازم معلومات او عملي زده کړې ورکړل شي.
ټاکل شوې ده، چې د ورکشاپ ګډونوال به د ناروغیو د څارنې او پر وخت غبرګون په برخه کې خپلې تخنیکي پوهې او عملي وړتیاوې لا پیاوړې کړي.
افغاني سره میاشت هڅه کوي د روغتیايي کارکوونکو د ظرفیت لوړولو له لارې د ناروغیو د څارنې، مخنیوي او پر وخت غبرګون سیستم لا اغېزمن کړي.
