تخار؛ د افغاني سرې میاشتې مرستیال له ولایتي څانګې لیدنه وکړه
پنجشنبه، ۱۳ ذو القعده ۱۴۴۷
د افغاني سرې میاشتې مرستیال، ښاغلي حافظ عزیز الرحمن، د خپل کاري سفر په ترڅ کې تخار ولایت ته سفر وکړ او هلته یې د دې ادارې له ولایتي څانګې څخه لیدنه وکړه.
د لیدنې پر مهال، نوموړي د ادارې بېلابېلې برخې وارزولې او د روغتیايي خدمتونو ترڅنګ یې د بزګرانو د مارکېټ د هغې پروژې د پرمختګ بهیر وڅېړه، چې ټاکل شوې د یادې څانګې په ځمکه کې پلي شي. هغه همدارنګه د ترسره شویو فعالیتونو، لاسته راوړنو او شته اړتیاوو په اړه معلومات ترلاسه کړل.
ښاغلي مرستیال د یادې ولایتي څانګې د مسؤولینو او کارکوونکو هڅې وستایلې او د بشردوستانه خدمتونو پر پراختیا، د اړمنو خلکو پر ښه ملاتړ او د فعاليتونو پر اغېزمنتیا يې ټینګار وکړ.
دا لیدنه په داسې حال کې تر سره کېږي، چې افغاني سره میاشت هڅه کوي، څو د بېلابېلو مرستندویه او روغتیايي خدمتونو له لارې د خلکو ستونزې راکمې او اړمنو هېوادوالو ته دوامداره بشري مرستې وړاندې کړي.
