د افغاني سرې میاشتې مرستیال د بلخ او سمنګان د اوبو پروژې د پرانیستې لپاره مزار شريف ته ورسېد
دوشنبه، ۱۰ ذو القعده ۱۴۴۷
د افغاني سرې میاشتې مرستیال ښاغلی حافظ عزیز الرحمن د بلخ او سمنګان ولایتونو کې د څښاک پاکو اوبو د پروژو د پرانیستې په موخه مزارشریف ښار ته ورسېد.
ټاکل شوې ده، چې نوموړی به د خپل سفر په لړ کې د یادو ولایتونو په بېلابېلو سیمو کې د اوبو د څاه ګانو د بیا رغونې پروژې پرانېزي، چې موخه یې د سیمې اوسېدونکو ته د پاکو اوبو د لاسرسي ښه والی دی.
یادې پروژې د خلکو د لومړنیو اړتیاوو د پوره کولو په هدف پلي کېږي او تمه ده، چې د عامې روغتیا د وضعیت په پیاوړتیا کې مهم رول ولوبوي.
سربېره پر دې، نوموړی به د خپل سفر په لړ کې د شمال زون اړوند د نمایندګیو له بېلابېلو څانګو او فعالیتونو څخه لیدنه وکړي، څو موجودې ستونزې او نیمګړتیاوې و ارزوي او د حل لپاره یې لازمې لارښوونې وکړي.
تمه ده، چې دغه سفر به د افغاني سرې میاشتې د فعالیتونو د پیاوړتیا، همغږۍ او اغېزمنتیا په برخه کې مثبتې پایلې ولري.
