قطر!
د افغاني سرې میاشتې سرپرست عمومي رئیس ښاغلي مولوي مطیع الحق خالص او د قطر الخیریه مرستندوی بنسټ د مسؤل ښاغلي نواف الهمداني ترمنځ د قطر هېواد په پلازمېنه دوحه کې د هرات له زلزله ځپلو سره د مرستو او افغانستان کې د بشري مرستو په اړه ناسته وشوه. ناسته کې ښاغلي مولوي مطیع الحق خالص د هرات د زلزلې له امله پر رامنځ ته شویو زیانونو او د زلزله ځپلو پر اړتیاو او مرستو خبرې وکړې او زلزله ځپلو ته د کورونو د بیا جوړولو په اړه یې د نړیوالو د مرستو غوښتنه وکړه.ناسته کې د قطر الخیریه مرستندوی بنسټ مسؤل ښاغلي نواف الهمداني ژمنه وکړه، چې د افغاني سرې میاشتې له لارې به په بیړه د هرات له زلزله ځپلو سره د ۲۰۰۰ خوراکي بستو مرسته وکړي او ترڅنګ به یې زلزله ځپلو کورنیو ته د خیمو او کورونو د جوړښت په برخه کې ونډه ولري. نوموړي همدا ډول له افغاني سرې میاشتې سره د دوامدارې همکارۍ هیله وښوده.
