کابل؛ د مالي مدیریت او حساب ورکونې د پیاوړتیا په موخه درې ورځنی روزنیز ورکشاپ پیل شو
سېشنبه، ۲۵ ربیعالاول ۱۴۴۸
د افغاني سرې میاشتې ټولنې د مالي مدیریت، حساب ورکونې او د مالي سیستم د لا پیاوړتیا په موخه درې ورځنی روزنیز ورکشاپ پیل کړ.
دا ورکشاپ د افغاني سرې میاشتې د مالي ریاست له لوري د مرکزي دفتر د یو شمېر ریاستونو کارکوونکو، د کندهار، هرات او ننګرهار زونونو او اړوندو نماینده ګیو مالي مدیرانو ته د ملي ټولنو نړیوال فدراسیون په مالي ملاتړ جوړ شوی دی.
د ورکشاپ په پرانیسته کې د افغاني سرې میاشتې د سکرتر جنرال عملیاتي مرستیال مولوي روح الله عبدالسلام، ګډونوالو ته د ښه راغلاست ترڅنګ د مالي چارو د سم مدیریت او د لګښتونو په برخه کې د اسلامي لارښوونو له مخې د اعتدال پر رعایت ټینګار وکړ.
نوموړي له ګډونوالو وغوښتل چې د ورکشاپ له موضوعاتو څخه په اغېزمنه توګه ګټه واخلي، اړوند مطالب په دقت سره زده کړي او ترلاسه شوې تجربې او معلومات له خپلو همکارانو سره شریک کړي؛ څو د مالي چارو په تنظیم او د ادارې د خدمتونو په ښه والي کې عملي اغېز ولري.
ورپسې د مالي چارو رئیس حافظ شبیر احمد عثماني، د مسلکي روزنې او د مالي کارکوونکو د ظرفیت لوړولو اهمیت ته په اشارې وویل چې د مالي چارو د لا ښه تنظیم لپاره د کارکوونکو مسلکي وړتیاوې پیاوړې کول اړین دي.
نوموړي زیاته کړه چې د دغه روزنیز پروګرام له لارې به د زونونو، نماینده ګیو او نورو مالي برخو کارکوونکي وکولای شي خپلې مالي چارې په لا منظم، دقیق او معیاري ډول ترسره کړي.
ښاغلي عثماني مالي چارې د ادارې له مهمو برخو وبللې او ویې ویل چې په دې برخه کې بې پامي او د چارو ځنډول د ادارې پر فعالیتونو او خلکو ته په وړاندې کېدونکو خدمتونو اغېز کولی شي.
نوموړي ټینګار وکړ چې اغېزمن مالي مدیریت د اسنادو پر بشپړتیا، د معلوماتو پر کره ثبت، منظمې کتنې، روڼتیا او حساب ورکونې ولاړ دی او مالي کارکوونکي باید د خپلو ورځنیو چارو پر مهال ټاکل شوي اصول په پام کې ونیسي.
په دې درې ورځني ورکشاپ کې به ګډونوالو ته د مصرفي ژورنالونو د کتنې، چک لېستونو د ارزونې، په مالي سیستم کې د معلوماتو د ثبت، د لګښتونو د تنظیم، مالي مدیریت، حساب ورکونې او نورو اړوندو مالي موضوعاتو په اړه عملي او مسلکي معلومات وړاندې شي.
