عمومي رئيس د بلخ والي سره زلزله ځپلو ته د مرستو په تړاو د همغږۍ ناسته وکړه
جمعه، ۲۳ جمادی الأولی ۱۴۴۷
د افغاني سرې میاشتې عمومي رئیس، ښاغلي شیخ الحدیث شهاب الدین دلاور د مل پلاوي سره شمال زون ته د سفر په ترڅ کې د بلخ ولایت له والي ښاغلي حاجي محمد یوسف وفا سره د وروستۍ زلزلې له امله زیانمنو شوو کورنیو ته د مرستو رسونې برخه کې د ګډو همکاریو په موخه د همغږۍ ناسته وکړه.
ناسته کې ښاغلي دلاور څرګنده کړه، چې د هېواد په شمال کې د زلزلې د پېښېدو له ورځې زيانمنو ته د افغاني سرې میاشتې د مرستو لړۍ روانه ده او دغه لړۍ به دوی ته د ژوند د بېرته عادي را ګرځېدو پورې دوام ومومي.
ورپسې د بلخ والي، ښاغلي وفا د زلزله ځپلو د بېړني لاسنيوي او بشري مرستو د ترسره کولو په پار د افغاني سرې میاشتې خدمات وستایل او د ولايت په کچه يې د دولتي او غير دولتي ادارو ترمنځ زلزله ځپلو ته د بشري خدمتونو وړاندې کولو برخه کې د ښې همغږۍ او بشپړۍ همکارۍ ډاډ ورکړ.
