کابل؛ د افغاني سرې میاشتې مرستیال او د بریتانیا سره صلیب مسؤول د همکاریو پر پراختیا خبرې وکړې
دوشنبه، ۶ محرم الحرام ۱۴۴۸
د افغاني سرې میاشتې مرستیال ښاغلي حافظ عزیزالرحمن په خپل کاري دفتر کې د افغانستان او پاکستان لپاره د بریتانیا سره صلیب له مسؤول ښاغلي جیرمي سمېت سره د بشري همکاریو د پراختیا او د ګډو همکاریو پر پیاوړتیا بحث او خبرې وکړې.
ښاغلي حافظ عزیزالرحمن له افغاني سرې میاشتې سره د بریتانیا سره صلیب د دوامدارو بشري مرستو مننه وکړه او وې ویل، چې افغاني سره میاشت په خپلو مرستونونو کې مېشتو بېسرپرستو مېرمنو او ماشومانو ته د درېیو کلونو لپاره د مناسب استوګنځي، پخو خوړو او حرفوي زده کړو اسانتیاوې برابرې کړې دي.
نوموړي زیاته کړه، چې له مرستونونو بهر بې سرپرستو مېرمنو او ماشومانو ته هم د لومړنیو اړتیاوو د پوره کولو په موخه نغدي مرستې، خوراکي توکي او حرفوي زده کړې وړاندې کېږي. هغه د مرستونونو د پیاوړتیا او پراختیا په برخه کې د بریتانیا سره صلیب د لا ډېرو همکاریو غوښتنه وکړه.
ورپسې ښاغلي جیرمي سمېت د افغاني سرې میاشتې د بشري فعالیتونو ستاینه وکړه او ویې ویل، چې دوی په دوامداره توګه د دې ټولنې له بشري خدمتونو او فعالیتونو څخه لیدنه کوي.
نوموړي په ځانګړي ډول د کونړ زلزله ځپلو ته د افغاني سرې میاشتې پر وخت، اغېزمن او اړین خدمتونه د دې ادارې له مهمو او بریالیو فعالیتونو څخه وبلل او د بېړنیو حالاتو پر مهال یې د دې ټولنې د چټک او اغېزمن غبرګون ستاینه وکړه.
ښاغلي سمېت زیاته کړه، چې د بریتانیا سره صلیب به د افغاني سرې میاشتې د مرستونونو، د سوري زړه ناروغانو د درملنې، د بېړنیو پېښو پر مهال د لازمو مرستو د برابرولو او بشري ډیپلوماسۍ په برخه کې خپل ملاتړ ته دوام ورکړي.
هغه د بېسرپرستو مېرمنو لپاره د کوچنیو کاروبارونو د رامنځته کولو په موخه د روزنیزو پروګرامونو د برابرولو یادونه هم وکړه او دا ډول پروګرامونه یې د هغوی د ځانبسیاینې لپاره مهم وبلل.
نوموړي ژمنه وکړه، چې د افغاني سرې میاشتې او بریتانیا سره صلیب ترمنځ د پنځه کلن هوکړهلیک له مخې به له دې ادارې سره خپلو بشري همکاریو ته دوام ورکړي او لا به یې پراخې کړي.
