لوګر کې د سېلاب ځپلو ملاتړ؛ ۲۵۵ کورنيو ته د نږدې ۳ ميليونه افغانيو په ارزښت مرستې ووېشل شوې
پنجشنبه، ۱۳ ذوالقعده ۱۴۴۷
د افغاني سرې مياشتې له لوري د لوګر ولايت مرکز پل علم، محمد آغې، برکي برک، خروار، خوښۍ او ازرې ولسواليو ۲۵۵ سېلاب ځپلو کورنيو ته د نږدې درې ميليونه افغانيو په ارزښت نغدي او غير خوراکي توکو مرستې ووېشل شوې.
د مرستو د وېش په مراسمو کې د افغاني سرې مياشتې عمومي رئيس، شيخ الحديث شهاب الدين دلاور، د سویل ختيځ زون رئيس مولوي سيد منهاج الدين هاشمي، د لوګر مرستيال والي مولوي محمد انور دين پرور، د لوګر د سرې مياشتې رئيس مولوي سيد هاشم سادات او يو شمېر نورو مسؤولينو ګډون کړی و.
د مرستې د وېش پر مهال عمومي رئيس وويل: افغاني سره مياشت هڅه کوي، څو د خپلو کاري شريکانو په ملاتړ د طبيعي او غير طبيعي پېښو له امله له زيانمنو هېوادوالو سره د مرستو لړۍ روانه وساتي.
ښاغلي دلاور زياته کړه، د دې ادارې له لارې به د هېواد په بېلابېلو سيمو کې اړمنو هېوادوالو ته بشري خدمتونه لا پراخ شي.
په دې مرسته کې ۲۰۵ کورنيو ته د ډنمارک سره صليب په مالي ملاتړ، هرې کورنۍ ته ۱۰،۵۰۰ افغانۍ ورکړل شوې، چې ټولټال دوه ميليونه، يو سل او دوه پنځوس زره او پنځه سوه (۲,۱۵۲,۵۰۰) افغانۍ کېږي.
دغه راز، له ۵۰ کورنيو سره د غير خوراکي توکو مرسته هم وشوه، چې د ملي ټولنو نړيوال فدراسيون له لوري چمتو شوې وه. د هرې کورنۍ لپاره پکې يوه خېمه، ۷ کمپلې، ۲ ترپالونه، د پخلنځي د توکو يو سيټ او يوه د اوبو بوشکه شامله وه.
افغاني سره مياشت د طبيعي پېښو له امله له زيانمنو هېوادوالو سره د ملاتړ او لاسنيوي لپاره خپلو هڅو ته دوام ورکوي.
