کابل کې پر ۶۳ بېوزله کورنیو بشري مرسته ووېشل شوه
پنجشنبه، ۲۰ جمادی الآخره ۱۴۴۷
د افغاني سرې میاشتې له لوري د کابل ښار اړوند د اوومې ناحیې پر ۶۳ اړمنو او بېوزله کورنیو ۱۰ قلمه د خوراکي او غیر خوراکي توکو مرسته ووېشل شوه.
یاده مرسته چې د ترکیې سرې میاشتې له لوري چمتو شوې وه، هرې کورنۍ ته ۲۰ کیلو وریژې، ۱۰ لیټره غوړي، ۱۰ کیلو بوره، ۵ کیلو نخود، ۵ کیلو مالګه، ۵ کیلو خُرما، ۵ کیلو د کالیو مینځلو پوډر، ۵ بوتله د لوښو مینځلو شامپو او نور اړین توکي ورکړل شول.
دغه مرسته به د یادو کورنیو لپاره د لنډمهاله خوراکي اړتیاوو په پوره کولو کې اغېزمنه تمامه شي.
