افغاني سره مياشت؛ له درملنې وروسته ۴۹ ناروغ ماشومان له المان راستانه او ۷۵ نور د درملنې په موخه واستول شول
پنجشنبه، ۱۵ جمادی الأولی ۱۴۴۷
د افغاني سرې میاشتې له لوري المان ته استول شوي ۴۹ تنه په اور سخت سوځېدلي او د میکروبي هډوکو لرونکي ماشومان له بشپړې درملنې وروسته هېواد ته راستانه او ۷۵ تنه نور ناروغان د درملنې په موخه المان ته واستول شول.
په کابل میدان هوايي ډګر کې په جوړ شوي پروګرام کې د افغاني سرې میاشتې عمومي رئیس ښاغلي شیخ الحدیث شهاب الدین دلاور د دا ډول ناروغانو درملنه یو ستر ګام یاد کړ او د راستنو شوو رغېدلو ماشومانو په روغتیا او بېرته راتګ د خوښۍ ښودلو ترڅنګ استول کیدونکو ماشومانو ته د سلامتیا دعا وکړه.
په ورته مهال، په هغه غونډه کې، چې خپلو کورنيو ته د رغېدلو ماشومانو د سپارلو په مناسب جوړه شوې وه، ښاغلي دلاور، د دوى کورنیو ته د ماشومانو د روغتیا او بېرته راستنېدو مبارکي وويله او د المان سولې کلي بنسټ يې مننه وکړه، چې افغاني سرې مياشتې سره په ګډه ددې ماشومانو د درملنې بهير پر مخ وړي.
ورپسې د المان سولې کلي خیریه بنسټ په استازولۍ ښاغلي ین یسن په خپلو خبرو کې ددې ناروغانو د درملنې بهیر په اړه هر اړخیز معلومات وړاندې کړل او ډاډ یې ورکړ، چې د استول کېدونکو ناروغانو معیاري درملنه به کېږي، همدا راز يې له افغاني سرې میاشتې مننه وکړه، چې په دې برخه کې یې د دوی بنسټ ته په افغانستان کې هر اړخیزې اسانتیاوې برابرې کړې دي.
د غونډې په پای کې هر رغیدلي ماشوم ته ۵۰ یورو او د اړتیا وړ درمل ورکړل شول.
ياده دې وي، چې د المان سولې کلي خیریه بنسټ سره په ١٣٦٨ لمريز کال کې د شوي هوکړه لیک له مخې هر کال دوه ځله، له یو څخه تر ۱۱ کلونو عمر لرونکي هغه ماشومان چې په اور سخت سوځېدلي يا د ميکروبي هډوکو ناروغي ولري، د درملنې په موخه المان ته استول کېږي.
