د نړیوالو ملي ټولنو له مسئولینو سره زلزله ځپلو ته د مرستو را جلبولو په موخه آنلاین ناسته وشوه
چهارشنبه، ۱۰ ربیع الأول ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور په افغانستان کې د کاري شریکانو ( آی سي آر سي، ملي ټولنو نړیوال فدراسیون او ناروې سره صلیب ) د استازو په شتون کې د ۷۵ هېوادونو د ملي ټولنو له مسئولینو سره د آنلاین ناستې له لارې کونړ ولایت کې د رامنځته شوې زلزلې، زیانمنو د اړتیاوو او خلکو ته د اوښتو زیانونو په اړه معلومات شریک کړل.
ښاغلي دلاور په خپلو خبرو کې وویل، چې زلزله ځپلو سیمو ته لاسرسی خورا ستونزمن دی، د ګڼ شمېر شهیدانو او ټپیانو سربېره زرګونه کورونه ویجاړ شوي او زلزله ځپلې کورنۍ سرپناه، د څښاک پاکو اوبو، خوراکي توکو او پراخو روغتیايي مرستو ته اړتیا لري، نوموړي زیاته کړه، چې د افغاني سرې میاشتې مرستندويه ټیمونه په سیمه کې شتون لري او زلزله ځپلو ته په بېلابېلو برخو کې بشرپال خدمتونه وړاندې کوي، له بده مرغه د اوښتونو زیانونو کچه ډېره لوړه ده او په دې بشري ناورین کې زلزله ځپلي هېوادوال پراخو بشري مرستو ته اړتیا لري.
د ملي ټولنو مسئولینو په رامنځته شوې پېښه خواشيني وښوده او ژمنه یې وکړه، چې د زلزله ځپلو د لاسنیوي لپاره به هېڅ ډول مرستې ونه سپموي او د زلزله ځپلو اړتیاوو ته په کتو به د افغاني سرې میاشتې له لارې خپلې مرستې لا پراخې کړي.
